vibration

انا معايا لادا موديل 82 روسى و بصراحة ما عملتش معايا اى حاجة رخمة يعنى يوم ما كانت تعطل عطل كبير جدا ( و نادرا ما يحدث )كنت باصلحها كلها ب 50 جنيه و مشكلة المقصات و البيض دى مش هاتظهر معاك لو بتعمل زيى يعنى كل شهر او شهر و نص اظبط و اربط و اكشف ب 20 جنيه المهم نرجع لموضوعنا :
حبيت يا سيدى ان ابيع اللادا و الله مش عشان المشاكل بس هى شكلها شوية مش شيك و قلت طيب ابيع و اجيب ايه؟؟؟؟؟ و قعدت اعمل شوية مقارنات بينها و بين بعض انواع السيارات الشهيرة و النتيجة كانت كالتالى :و هانبدا بالعيوب
1-بيض المقصات : يعنى ليه تسيبوا و ترجع تقول وحشة ده انت تقدر تبقى ماشى مطمن لو كل 3000 او 4000 كيلو تطمن عليهم ب 20 جنيه
2-عربية تقيلة : و خشنة و رخمة كمان لكن ساعة الركنة على الواقف بس انما و انت ماشى ما فيش اى فرق ده حتى عدم وجود الباور اكثر امانا على السرعات العالية و بعدين( يعنى لما تبقى طول النهار قاعد على مكتب اعتبر نفسك فى 5 رياضة و بالمرة باى و تراى و ترابيس)
3-شكلها رخم قوى : بس و الله حسبتها يعنى بدل ما اصرف مثلا 10 الاف او 15 الف علشان اغيرها ممكن قوى اصرف عليها 3000 او حتى 5000 و اللى يشوفها يتنح جنبها
انا عن نفسى شفت ناس راكبة لادا مش لادا خالص
دى اهم شكاوى الناس من اللادا صح ؟؟؟
طب تعالوا نشوف المميزات
1-وحش الطريق :يعنى اللادا و البيجو 504 ليهم هيبة خاصة على الطريق حتى من سواقين الميكروباصات (و اسالوا اللى ساكنين امبابة )فى حين انك لو راكب عربية من اياهم يبقى يعنى انت حر معاهم و ماحدش هايعمل لك حساب لانك هاتتعور لوحدك
2-برضه وحش الطريق :يعنى انا باسافر كتير جدا و عاوز اقولكوا انها بتجيب 140 مرتاح قوى (صحيح مش بتعدى 150 ) بس يعنى اهو برضه بتحميك من نفسك و لا ايه ؟؟
3-ما بتقولش لا :يعنى بنزين 80 شغال 90 شغال 95 ترقصلك فى السكة و لا ال bmw
رادياتير مية خضرة شغال مية حنفية برضه شغال زيت تعاون شغال موبيل شغال (بس المهم انت بتحب تحافظ عليها و لا لا)
4-واسعة من جوة :و ده طبعا بالمقارنة مع اقرب حاجة ليها و هى الشاهين( جرب قعدة الشاهين و قعدة اللادا ) يعنى لو متضايق مثلا من حماتك و مش عاوزها تركب معاك تانى قعدها فى الشاهين على الكنبة اللى ورا و شوف النتيجة انما فى اللادا هاتلزقلك
5-مصاريف الصيانة :مش مصدق اسال اللى راكبين يابانى و امريكانى و اوروبى كمان
6-قطع الغيار :عند البقال و اصلى و ال 5 بقرش
7-الميكانيكية :اى حد يفهم فيها و يشغلها زيها زى ال 128 بالضبط
8-جسمها جامد قوى:ما اقصدش طبعا انها مزة بس اسالو ركاب ال 128 عن عيوب الشروخات و الشاسيه
9-اماكن الصيانة :يعنى بفرض عملتها معاك فجاة فى اى مكان (الحمد لله ما حصلش معايا ابدا) و مش لاقى ميكانيكى اى سواق تاكسى يمشيها لك لحد ما تروح للميكانيكى و لو انت مفتح شوية ممكن بنفسك
10-السعر : يعنى اسال نفسك سؤال بسيط لو هى و الشاهين واحد (و ده بفرض ) ايه اللى يخلينى ادفع فرق على الاقل 10000 جنيه فى نفس العربية بس انعم شوية؟؟؟؟ ده 10000 جنيه لو شاهين يعنى مش يابانى و لا امريكانى !!!!!!

يعنى خلاصة الكلام ادى لكل ميزة من دول درجة و كل عيب درجة و قارن زى ما انت عايز
و شوف النتيجة بنفسك
و خلاصة الكلام معاك فلوس عاوز تضيعها عشان ركوبة مرتاحة و برستيج ممكن بس ما تشتكيش من انك مش لاقى قطع الغيار او الصيانة غالية او مش لاقى حد يفهم فيها
اما بقى لو انت زى حالاتى موظف و عاوز عربية اصيلة عائلية بتسافر تصونك و تحافظ عليك وواسعة و مريحة ليك و لاسرتك و عيالك (و لجيبك)

HISHAMELSHAZLY

أنا بحترم تقييم حضرتك جدا و للأسف إحنا أغلبنا بيبص للمناظر يعنى انا معايا فى البنك زمايلى مشتريين سيراتو ب130000جم و قرفانين منها و كمان بيصوتوا من تمن العربية فليه الواحد ما يشتريش اللى محتاجه الفعلى زى ما بيحصل فى أى دوله محترمه فى العالم

TAMERTITOTITO

طيب اخبارها ايه فى اعاده البيع ؟
هل بتتباع بسهوله ولا متعبه

vibration

لا مش هتتعبك في بيعها ناس كتير بتفضل اللادا علشان قوية و متينة

TAMERTITOTITO

طيب ياباشا و مشكلة الصالون الغير مريح على الاطلاق
و مشكلة السخونه

TAMERTITOTITO

واضح ان محدش مهتم بالادا تماما

ميما المصرية

انا جربت الحديث من اللادا 2107 وهاقولك على حاجة عجييييييييبة فعلا العربية ناعمة وتمنها حلو في حدود خمسين الف جنيه والعربيات الحديثة بتكون غالية عشان تصاميم وامكانيات وحركات لكني اعرف انها عربية ناشفة وشديدة اعرف واحد ابنه طلب عربية جديدة جابله لادا عشان ما يجريش بيها على الطريق لانه شاب وخايف عليه

Moustafa

اشكرك على المقارنة دي يا باشا بجد افدتني كتير انا رايح اشتري لادا 2107 موديل 2011 ان شاء اللة سوال تاني بعد اذنك في السوق في 2011 روسي مستورد و مصري من الاخر اجيب اية ؟؟؟ و اية الفرق غير موضوع الكربرتير و الانجكشن

غير مسجل

الله يا اخى باين عليك صاحب شركة لادا عامة عليك اسلوب ميه ميه انا عن نفسى ناويت والله على اللادا بعد كلامك ده